الأحد، يونيو 09، 2013

أعراس 2013 -جزء 2

عرس الاطفال ,,,


بالرغم من كل الرجاءات التي تُكتب على كرت الدعوه "الرجاء عدم اصطحاب الاطفال" أو نوماً هنيئاً لاطفالكم" أو " جنّة الاطفال منازلهم" إلا انه من المعروف ان لا أحد يلتزم والجميع يصطحب أطفاله الى العرس وخصوصاً إذا كان العرس يقام في صالة أفراح وليس في قاعة فندق 5 نجوم "خصوصاً الصالات الممتده على طول اوتوستراد عمّان - الزرقاء"...هذه بالذات تخصصها الرئيسي "اعراس الاطفال" .
عرس الصالات مستباح عرضه مستخف بقيمته من قبل العالم مع إنه قيمته مش قليله هالايام ! و أغلب الصالات باتت تعد نفسها من فئة الخمس نجوم وأسعارها بالعلالي!
لكن الاهل بيطنّشوا وطالما ما في عشا فما في أحراج ,وفرصه يطلّعوا الاولاد يتفسحوا ويشمّوا الهوا  وياكلوا كيك ويشربوا كولا على حساب العريس ال"ماكل هوا" .
أو على الاقل بيقولوا ما كل الناس جايبه اولادها ما وقفت على اولادي ...أو أولادي عاقلين وما بيتحركوا من محلهم!!!
عرس الجمعه الماضيه كان في تقريباً 150 امرأه و 100 طفل ! 

في الزفه وبينما الست ماجده الرومي تصدح بأغنيتها الرائعه؛طلّي بالابيض طلّي كان المشهد كالآتي:
طلّي بالابيض "واااااااااااع" طلّي
يا زهرة "وااااااااااااااع" نيساااان

وخلال رقصة العرسان السلو  أو تقطيع التورته...  تسمع في الخلفيه "مااااااما خلي حموده يقوم عن الكرسي" أو "آآآآآآآي ضربني " أو "مش شايف ,طلعوني على الطاوله " وفي الآخر كمان "واااااااااااااااع " 
هذا طبعاً عدا عن الركض بين الطاولات واللعب تحت الكراسي أو قعدتهم على  الكوشه كأنهم قاعدين بصف مدرسه .
يعني والله عيب ...عيب وحرام كمان!

نصيحه ورجاء حار للمدعووين ؛ لو ما كان العرس بيخصّ أخوك أو أختك أو أعز أصدقائك أو صديقاتك و ضروري تكون موجود ومافي حد تترك عنده الاولاد فبلاش تروح وتأكد أنه ما حد حيعتب عليك أو يزعل منك لو ما رحت, بالعكس حيكونوا مبسوطين لما تقولهم ما قدرت أحضر عشان الصغّار. 
أو يختي تفاهمي أنتي والمحروس جوزك واحد فيكم يروح يعمل الواجب والتاني يضل مع الاولاد في البيت.

و عشان ما تقولولي انتي ما كنتي تاخدي اولادك معك على اعراس وهم  صغار ؟؟؟
أقول بكل صدق و أمانه ...........نعم كنت أخدهم معي ههههههههههههه
يعني كل العالم ياخدوا اولادهم وانا اولادي يضلهم محبوسين في البيت ؟!!





هناك 8 تعليقات:

  1. أنا أشطر منك
    ما بعمري اخدتهم إلا ع عرس أخوي مره وعرس أختي فقط لا غير لإنه مافي حدن أحطه عندهم


    شفت من هالإشيكلات,, المصيبه مش بحضور الأطفال
    المصيبه إنه الإم مفكره حالها رايحة ع نادي إجتماعي ف بتروح بتفلت أولادها ياخدو راحتهم ع الأخر

    يعني ضيافه ببلاش ورعاية للأطفال ع حساب أعصاب العروسه وأهلها لووووووووووووول

    في إختراع جديد في الصالات يعملو حضانه للأطفال
    " بصالة أخوي هيك كان مابعرف باقي الصالات"
    بتحط الإم الولد بالحضانه وبتستلمه بأخر الحفله

    ردحذف
    الردود
    1. وانا بمزح معكم ...اخذتهم مرتين او تلاته مش اكتر بس كنت مضطره وضروري احضر :) اصلا انا ولادي عاقلين و ماا بيتحركوا من محلهم ههههههههه
      لا الجد الجد...اني كنت انحشر بالبيت وراحت علي اغلب اعراس العيله وهم صغار...كنت منعزله اجتماعيا حتى زيارات و مباركات ما كنت اروح...عشان هيك هلا بعوض اللي فاتني وما بخلي مناسبه تعتب علي.

      فكرة الحضانه ممتازه بس ما شفتها لهلا بالصالات ...وعلى اعداد الاطفال اللي بشوفهم بالاعراس بدهم حضانتين تلاته مع بعض حتى يستوعبوا الكل .

      حذف
  2. بدي هاي الحضانة ههههه
    لإنه عرس أخوي قرب يا أم عمر
    نيسانة بدي الفستان اللي ع البنوتة.. بياخد العقل... لإنه برضه عرس أخوي قرييييييب
    أنا من النوع اللي بضل قاعدة ف بيتي... ههههههه
    لإنه بتعب مع قرداتي هههههههه
    حتى خطبة أخوي بس وحدة راحت معي.. وع العرس هيك ناوية أعمل إن شاء الله

    ردحذف
    الردود
    1. على حسابك كل الفساتين نسرينا ...دققي منيح تصميمه سهل وبتقدري تعمليلهم عند اي خياطه ...اذا قدرتي توصلي الخياطه هههههههههههه.

      مبروك مقدما لأخوكي وعقبال ما تفرحي بالثلاثي الشقي ان شاء الله.

      حذف
  3. ههههههه عجبني التصريخ الاخير...بس نسيتي تكتبي "والله انا اولادي عاقلين " :) هههه
    يا ستي في اطفال مدمرين ومخربين حقيقيين للاعراس...و برضه بتكون جملة نوما هنيئا لاطفالكم هي سبب اساسي لخلافات عائليه و مصيبه اذا في عدد مدعوين وما كتبتي العدد شامل الكبير و الصغير و المئمط بالسرير كمان _هيك بحكوها صح :$

    ردحذف
    الردود
    1. هههههههههه...هاي مفروغ منها :)

      صحيح والاولاد بس يجتمعوا مع بعض بيشجعوا بعض اكتر على الخراب.
      والله هالجمله بطل حدن يعبرها ...صاروا اهل العرس يتصلوا تلفونات بالمعازيم اللي عندهم صغار يأكدوا عليهم وهون بيبدا الاكشن والافلام و الزعولات :)

      المئمط بالسرير ههههههههههه ايون تمام .

      حذف
  4. هههههههههههههه
    سعيد حقا اننى هنا بعد غياب اما الاطفال فهم نعمة من الله وانا شخصيا اشعر بالتقصير فى حقهم اذا لم اخذهم معى الى الاعراس وطبعا اتفق مع كلام ام عمر فى عمل حضانه للأطفال فى الاعراس

    الصور اللى فى البوست جميلة جدا
    تحياتى نيسان

    ردحذف
    الردود
    1. اهلا محمد ...سعيده انا كمان بوجودك :)
      ان شاء الله تزبط فكرة الحضانه ...عن جد وجود اكتر من 3 اطفال بالعرس كارثه قوميه اجتماعيه هههههههههههه .
      شايف ما احلاهم ّان شاء الله ربنا يرزق كل العرسان ببنوتات حلوين زيهم.

      حذف