السبت، يونيو 11، 2011

علامات النجاح


طلبت صديقتي هاتفياً ....جاء صوتها متوتراً وقالت لي لحظه يا سوسو خليكِ معي....وكملت حديثها على الطرف الآخر :
انا اتعب واشقى وانتوا ولا شاعرين فيي ....سميّت لي بدني ...الله يسمّ بدنك ....قهرتني الله يقهرك...جلطتني الله ياخدك ويريحني منك !!!......روح من وجهي هلا و (حسابك بعدين )!!!!

-الشغله فيها  حساب وعقاب !!!
      خير ؟ احكيلي يا فوفو ....ايش اللي صاير؟ايش هي المصيبه اللي صايره ؟


-الولد يا سوسو ...


-خير ؟ايش عامل الولد؟


-قهرني الله يقهره ....وياخدو ويريحني منه!!!


- بعيد الشر عن قلبه ...سارق  منكم فلوس؟


-لا مش هيك ...


-ضارب حدا من الاولاد التانيين  ب موس؟


-لا مش هيك....


-متعدي على استاذه بالمدرسه وضربه؟


- لامش هيك....


-بيهرب من المدرسه وبيصيع في الشوارع؟


-لا مش هيك...


-بيشرب كحول؟؟ او بيحشش مثلاً؟؟؟


- لا مش هيك....



-خوفتيني! ليكون الموضوع اكبر من هيك!!
    متهم بالارهاب وزعزعة أمن الدوله مثلاً !!!


-هههههههههههه ....لا مش هيك!!!


-طيب شو في؟ قولي؟


-جاب 16\20 في امتحان الرياضيات!!!


-$%^&%$#


-ليش يا سوسو؟ انتي عارفه الاولاد ما لهم حد الا انا...وانا مسجليتهم في احسن المدارس و فوق هذا في معلمه خصوصي بتدرسهم وآخرتها ....يجيب 16\20 في امتحان الرياضيات!!!  
انا بعمل هيك عشان مستقبلهم ....

-يعني مستقبلهم وقف على العلامات ! طيب وين شخصية الولد؟ وين ثقته بنفسه؟
اللي ضيعتيها وانتي بتبهدلي فيه وبتمسحي فيه البلاط؟
انتِ عارفه انه المستقبل  و خصوصاً في بلادنا ...في عوامل كتير بتحكمه غير العلامات ....والشهادات .....ما اكتر الخريجين وحملة الشهادات العليا في البلد لكن الشغل الممتاز والمستقبل الناجح بحاجه الى شخصيه قويه ومظهر ممتاز و مهارات تواصل ....وممكن تتوفر هذه كلها و لسه يكون بحاجه الى  علاقات عامه و....و....فيتامين (واو) .....يعني يا صديقتي مستقبل الولد ما وقف على العلامه !!!انتي مسحتي فيه الارض وزعزتي ثقته بنفسه و نسيتي انهم مهمين لمستقبله زيهم زي العلامه بالزبط .... 


- معك حق يا سوسو...بس انا عصبت لما تفاجئت بالعلامه وانا مش منقصه عليه شي بيطلبه ومدرسته من احسن المدارس في عمّان ومعلمته الخصوصي بتاخد الشيء الفلاني على كل درس.....


-صحيح ....لكن هدي اعصابك وروقي وما دام انتِ مش مقصره ومتابعه اولادك وبتهتمي فيهم ان شاء الله ربنا ما بيضيّع تعبك ولا تعبهم 


-معك حق....خلص صحيح....انا ليش مكبره الموضوع كتير ؟ ومعصبه؟ مش ناقصني انا يا سوسو و انتِ عارفه الظروف ....

-خلص حصل خير ....الله يهدي بالك ويسعدك ويفرح قلبك بأولادك وان شاء الله بتشوفيهم زي ما بتتمني واحسن ....لا تخافي ربنا معكم

-الله يسعدك يا سوسو...والله  مكالمتك اجت في الوقت المناسب حتى اهدا شويه والحمدلله هلا هديت وروئت و شو اخبارك انتِ ؟


-انا زي الزفت ...زي القطران ...تعبانه يا فوفو واحوالي زفت الطين...


-ليه يا سوسو ؟خير شو في؟ في مصيبه لا سمح الله ؟


-اه يختي ....مصيبه ولا كل المصايب ....الولد 


-مالو الولد ؟ (تكرر السيناريو اللي فوق الولد سارق او هارب او ارهابي؟)


-لا مش هيك ....الولد يختي....اختار الفرع الادبي ....بدل العلمي 
  الله يهده ....الله يقهره ...الله ....الله .......بدو يضيّع مستقبله ...ضاع مستقبل الولد!!!

- bla bla bla

-bla bla bla


-سلام ....
- مع السلامه


وانتهت المكالمه .........ولم نـنـتهي بعد 
....من سمّات البدن والامتحانات والعلمي والادبي والشهادات  والمستقبل الذي ضاع!


هناك 29 تعليقًا:

  1. المشكله ان الولد هيك بتعود ان اي شي بيصير بالحياه اله نفس التعصيب و ردات الفعل و وشوي شوي بتكبر المصيبه مهمه هيك هيك مش راضيين و معصبين فيعصبو على شي محرز و مع الوقت حتى هالتعصيب ببطل اله فائده لانه بصير من باب "علقة تفوت ولا حد يموت" بكونو همه معصبين و هو بفكر باحداث المغامره اللي عملها او همه بسبو و هو بخطط للمغامره اللي وراها

    بس الله يسامحها كتير دعت عليه :( حتى ولو من ورا قلبها برضه كتير

    ردحذف
  2. بعد هالكم الهائل من الدعاوي بتتوقعو إنه أولادهم يتفوقو؟؟؟
    كيف رح يجيه نفس يدرس وهوه عارف إنه إمه داعيه عليه تقايله بكره العيد؟؟
    في إسلوب للتأنيب وإسلوب صديقتك أبدن مش بشري

    ردحذف
  3. الله يهديها ويصلح حالها يا رب
    أنا بكره انو أي انسان يدعي على إنسان فكيف الولد سبحان الله كلمات بنحكيها وما بنفكر فيها
    بره وبعيد عنه ليش هيك
    لا والله يجيب صفر من ميه ويضل حولي وحوليه اسم الله عليهم بالاخر بيزبطوا وبيجيبوا رواتب وبيشتغلوا ما شاء الله عليهم

    ردحذف
  4. الســلام عليكم

    انا بس حبيت أحط مداخلة بسيطه من بعد إذنك
    بعد تقديم الاحترام الشديد إلك ولصاحبيتك

    لا العلامة .. ولا الفرع .. ولا حتى كم بندفع على الولد مصاري .. بحدد مستقبله ..

    بكل بساطة .. لكل طفل قدرات .. من نوع مختلف ..
    مش شرط تكون قدرات طفلي أو طفلك من نفس النوع .. (النوع الاكاديمي) .. عشان يكون ناجح .. وإله مستقبل ..
    المجتمع صاحب رؤيته ضيقه وبيربط نجاح الفرد بنجاحه الاكاديمي فقط .. وهذا الكلام مش صحيح ..

    انا ما بقول إنه طلعيه من المدرسة وفلتيه بالشوارع ..

    أنا بقول إنه المطلوب من كل أب أو أم غدراك قدرات الطفل .. وتوجيه للاتجاه المناسب لقدراته ..
    مش لازم كل الاولاد يكونوا (الاول عالصف) .. أصلاً ما فيه إلا أول واحد ..

    واسف على الاطاله

    :)

    ردحذف
  5. وين راح التعليق :( راح أرد أعيد:

    عشان هيك فيه تمسحة متفشية بين طلاب المدراس والخريجين اللي أجبروا على اختيار تخصصات أهلهم بدهم اياها.

    أمس تحدثت مع سيدة ابنها طالب جامعة بدرس بكالوريوس تأهيل رياضي واشتغل فترة أثناء دراسته وبدو يكمل ماجستير بتخصصه بس يخلص. أمه مش معترضة بس شوي مستصعبة مسألة إنه دراس "رياضة" بس الشاب ما شاء الله عليه فهمان وبس تحكي معه يعشق كل ما في تخصصه وعمله لدرجة إسأليه أي سؤال ولو بعيد شوي عن تخصصه بجاوبك. هذا الشاب راح ينجح.

    وهذا ما نفتقده: أن ندع أبناءنا يختارون العمل والقيام بما يحبون بدلا من إجبارهم على دراسة شيء معين ليحملوا بالنهاية مسميات ك"مهندس" و"طبيب" نحن نحبها. وآسفة عالإطالة

    ردحذف
  6. و الله شكلو ما حنخلص من هالعقلية إلا بعد 1000 سنة!

    أدبي و 16 من 20!

    يا للخزي ، يا للعار!
    :(

    ردحذف
  7. راح أعلق ع قصة ( ادبي) ..
    وشو راح يصير بالكون اذا تخصص ادبي ؟
    اذا هو بيحب هالشي اتركوه , هوي بيعرف قدراته وميوله أكثر من غيره
    أنا تخصص ادبي ( 2ddaby and proud)
    D:
    وعملولي طوشة انو ليش ادبي واخواتك كلهم علمي , واللي بيحرق القلب انو ياريت يعني في اهتمام..
    بالنتيجة .. أنا الوحيدة اللي كمّلت للجامعة لأنو اخترت اللي بيناسبني واللي حسيت انو راح أنتج اذا دخلت هالتخصص ..

    يا امهاتنا ويا أبائنا : ابنوا شخصية ابنائكم بالأول , شجعوهم ع قراراتهم ولا تستعروا من خياراتهم وتخصصاتهم وتمسحوا فيهم البلاط ! انتو ليش هيك؟؟؟!!
    -_-"

    ردحذف
  8. والله بعد دراسة 8 سنين وشغل سنه بمجال آخر ولا الو خص
    بقدر احكي من تجربتي الخاصه كلو سوالف حصيده!
    المهم شو بيصير معك وبايش بتبدع، بلا دراسه بلا هم
    حتى انو انعرض علي اكمل دراسة دكتوراه في الهندسة بالمانيا ورفضتها
    بصراحه العمر مش بعزقه ومش جاي ع بالي ابعزق الباقي
    فلا تحرقي دمك انتي وصاحبتك ولا ما يحزنون، حتى تجربتي بحاول افيد فيها اللي حوالي
    بالاخر مهاراتك هي اللي بتساعدك مش اشي ثاني الا من رحم ربي

    ردحذف
  9. حسبي الله و نعم الوكيل بس،بدهم اياهم كلهم اطبا و مهندسين خلص لازم لو شو ما كانت ميولهم و قدراتهم...ولا بيعجبهم العجب هالاباء و الامهات،بيفكروا المستقبل بالتعليم بس و بلا شخصية بلا تعزيز ايجابي كلو حكي فاضي
    بصراحة انسم بدني

    ردحذف
  10. هاي ذكرتني ب٤/٣ أمهاتنا في العالم العربي بتشل امل الواحد!
    طيب ومآلها ١٦ حلوة
    هو تعرفي في شغله راح احكيها ويمكن ناس ما تعجبهم الكلمه لكن الاهل بيخلفوا وبيحملوا اولادهم جميله في خلفتهم لهيك الواحد يجيب اللي بيقدر عليه يعني اللي بتقدر تربي واحد تجيب واحد مش تجيب عشرة وتسم بدنهم!
    وبعدين إحنا في الأردن مين بيسال عن شخصيه او حتى نفسيه خلص مأكل شارب نايم لابس معناهم عايش لهيك عنا نسب عاليه من الاكتئاب والعالم مش داريه نصيحه الى صاحبتك تروح ع طبيب نفسي لانها مكتئبه ويدها علاج حتى ما تنتج عالم مكتئبه !

    ردحذف
  11. الصورة في نهاية المقال تلخص كل شيئ
    ولوووولللللوووول
    للصبح ...

    16/20 اللهم عافينا الدنيا اخر وقت ...
    ههههههههههه

    يعني اخترت علمي وتخوزقت دروس خصوصي وبديش اطلع مهندس طيران شو الفائدة ...

    ردحذف
  12. مافي حد من المبدعين في هالدنيا إلا وكان مجال شغله أو حتى إختراعاته إلا وكانت في مجال شغفه .
    بلحظة بحط حالي مكانكم وبحكي آه أنا لو ربيت وتعبت وأنا لو علمتهم وتعبت عليهم أكيد بدي أختارلهم الإشي يلي بشوفوا أنا مناسب إلهم .
    بس زي ما همه بلحظات ممكن يكونوا غلط أنا كمان ممكن أكون غلط .. حب التملك عند الأهل بيتعدى حدوده.

    أنا دخلت أدبي - أهلي كرهانين المجال لأنو عارفين شو براسي .
    طلبات الجامعة رفضوا أحط حقوق رفض قاطع وحطو تخصص الآداب واللغات قبل الحقوق - وأنا كنت مقهورة .
    وسبحان الله قادر على كل شي سنتها رفعوا علمات اللغات وصفيت بالآخر تخصص حقوق - أهلي ما عجبهم
    تفوقت وكانت دراستي كتير عاليه - أبوي سنة تانية حكالي غيري تخصصك حتى لو متفوقه وحابة مجال دراستك لأنو قال شو مافي فايدة وبكرى بتقعديلي في الدار - عندت وعنترت .
    الحمد لله حالياً متفوقه على كتير محاميين حتى لو إني متدربه وقدرت أحصل أكبر كم خبرة ومعلومات بالمحاماة ومستقبلي حاسيته مريح رغم كل يلي عم ينحكى عن المهنه .

    بس بتعرفي شغلة .
    مابعمرهم أهلي باركولي من قلبهم بأي نجاح عاندتهم فيه حتى لو كان نجاحي كبير .
    أهلي حسب مابسمع إنو بفتخروا فيي قدام الناس بس هالحكي من ورا ضهري .. في وجهي مابقدروا يحكولي مبروك رفعتي راسنا (في شي خالفتينا فيه) وماعندهم أستعداد يبينوا أي تفاؤل في مستقبلي .

    بس مع هيك بعرف حالي أنا كسبت مش إنتو .. أنا كسبت شغفي وحلمي .. وإنتي عم تركضوا ورا تملككم وسطوة الأبوة علينا بكل عميانية .

    ويلي بعرفوا إنو خواتي وأخوي زي العسكر ماشيين في حياتهم - وأنا حرة بحالي وبإختياري .

    لا تخلي هاي المساحة توسع وتكبر بينكم وبين ولادكم .. ساعدوهم وكونوا معهم ,

    ردحذف
  13. Nice post
    But u should leave them choose their way

    ردحذف
  14. ويسبر
    المشكله انه مافي مشكله مستاهله كل هالتعصيب ...لا هو عمل جريمه او معصيه لا تغتفر ...المشكله فينا مش فيهم!

    ردحذف
  15. غير معرف
    هو مهما درس ما رح يعجبها...ولا ح يعجب حاله...رح تضل عقدة الذنب ملازميته طول عمره !

    الله يهدينا ويصلح حالنا

    ردحذف
  16. خلود
    ما في شي مستاهل...لا سمح الله اذا صار له شي ...مهي ح تنجن عليه....بس تعصيب كذابي وتهديد على شي لا هو ذنب و لا جريمه.
    نعم الله يهدينا ويصلح امورنا

    ردحذف
  17. اكوسان
    اهلا وسهلا بك وشكرا لمداخلتك ويشرفني وجودك...

    هذا بالضبط ما اردت ايصاله من هذا السيناريو...رؤيه مجتمعنا الضيقه للنجاح وتحميل ابنائنا فوق طاقاتهم أو التغاضي عن الجوانب الايجابيه الاخرى لديهم وحصر كل رضانا عليهم بعلاماتهم.

    ردحذف
  18. اسيل
    صح ...عشان هيك ما في ابداع ...لاننا ما بنعترف الا بالابداع اللي بدنا اياه وبس...العلامات وبس...التخصص وبس....اللقب وبس....والباقي كله خس:)

    ردحذف
  19. هيثم
    الله يبشرك بالخير ...الف سنه بس!!!

    عقليات ....عئئئئد ....ع رأيك

    ردحذف
  20. بوليت
    انتي تعليقك بدو تدوينه لحالها....
    بس ح اقولك هون: اول شي انتي بنت والبنت شو ما درست مش مهم ....مهي اخرتها لبيت زوجها!!!
    يا ريت ما حد يعمم....انا بحكي عن عن حاله عامه ولكن لا تشمل الجميع ....في ناس عم يتغلبوا على هالعقده:)

    تاني شي يا بطه...ليش انتو هيك؟؟؟
    هالسؤال معقد كتير ...بدو علماء اجتماع حتى يجاوبوا عليه ويقدروا يحلوا معضلة :ليش نحنا هيك!!!

    الله يسعدك ويرزقك بالشغل اللي بتتمنيه يا عصفوره.

    ردحذف
  21. مياسي
    افيدينا الله يفيدك...

    نحنا فكرتنا ان الشغل الممتاز ما بيجي الا بالشهاده وهو صحيح مبدئياً....لكن برضو بدو مهارات وكفاءات وشخصيات ....وغالباً واسطات ...لكن نحن معئدين ...ولا كل الحكي بالدنيا ح يقنعنا ان نغير نظرتنا...

    وين التجربه الدنماركيه؟
    عم ننتظر ....الشيشاني وانا :))

    ردحذف
  22. رين
    سلامتك من سمة البدن ....الكل بيتمنى هيك وما بيقصر ومستعد يدفع اللي فوقه واللي تحته عشان الولد يطلع دكتور او مهندس.....شو شخصيه و تقدير للذات ...من وين جايبه هالحكي؟؟؟ لتكوني شيوعيه يا بطه ههههههههه

    ردحذف
  23. سوزان
    ماكل شارب نايم....شو بدنا احسن من هيك!!!!
    لا شخصيه ولا بطيخ!!!
    مش صاحبتي لحالها اللي بدها طبيب نفسي ....وحياتك 99.9% منا بحاجه له....اللي عنده اولاد واللي ما عنده ....العقد كتير وعلى قفا من يشيل!!!

    ردحذف
  24. فاينل واي
    اللهم عافينا!!!شايف الذنب الاكبر 16\20 ....لو رسب مثلاً شو بيصير فيها؟؟؟
    والصوره معبره اكثر من الف كلمه!!!

    ردحذف
  25. نورنياتي
    الحقوق كان واحد من التخصصات اللي حابيتهم....بس نفس الشي...اهلي رفضوا الفكره ....قالوا ما احلاكي وانتي من المخفر للمحكمه وبالعكس...ع اساس اني داخله المخفر كمجرمه؟؟؟؟!!!

    احييكِ على تمسكك برأيك .... هو الاساس اني نربي اولادنا على الاختيار الصح والدفاع عن شغفهم عن الشي اللي بيحبوه....لكن زي ما قلتي....حب التملك...حب التفاخر...حب المظاهر...وسياسة القطيع كلها ع بعضها ....الله يصلح حالنا

    ردحذف
  26. انا عندي اعترضين : ليش الأم بتدعي وهي بتبهدل حتى لو معصبة ما بسير!! شو بتستفيد اذا لا سمح الله الله استجاب الدعاء ؟ بشو رح ينفعوها العلامات !! وعموما هاي ظاهرة في مجتمعاتنا كتير سيئة ومن وجهة نظري لازم نحاول نقضي عليها
    2 إذا على شي تافه بسير هاد التعصيب على الأشياء الكبيرة شو بدو يسير؟؟ وكمان اذا الأهل بكونوا هك بالأخير الأولاد ببلدوا وبتبطل تفرق معهم لأنهم بسيروا حاسين انهم ما عم يعرفوا يرضهم لو شو ما عملو
    وبس
    مع هيك الله يعين الجميع ويصبرهم ويهدي بالهم اميييين :)

    ردحذف
  27. صباح الخير هناء

    الام بتدعي " وهو خطأ طبعاً" لكن في نظرها ان هذه مصيبه وهيك برايها الولد ح يشعر بتانيب الضمير ويدرس اكتر ويتعب ع حاله اكتر....لكن غالبا النتيجه عكسيه...
    الولد يحبط وبيشعر انه شو ما عمل مش ح يرضيهم وهذا طبعا ح ينعكس ع شخصيته وتقديره لذاته وثقته بنفسه.
    انا حبيت اركز ع نقطه الدعاوي لانه الامهات بيعملوها بدون تفكير ....لكن بالطبع هي غلط .

    ردحذف
  28. بعرف انها بتكون من غر وعي بس بعقل الأطفال و المراهقين و اوقات حتى الكبار بتعلق وبتدايق وبتأثر كتييير واالله

    ردحذف