الثلاثاء، سبتمبر 28، 2010

عظم الله أجركم


الموضوع كتبت عنه ام عمر قبل فتره ...موضوع بيوت الاجر "العزاء" والمعزيين 
والاطفال والاشياء اللي بتصير في بيوت العزاء وكأن الموت ما عاد له رهبه في قلوب الناس



في الايام الاخيره صار في عندنا حالتين وفاه "الله يرحمهم" ويرحم اموات المسلمين جميعاً...أحدهم قريب من العائله والاخر نسيب للعائله من بعيد

يوم الجمعه الماضي ذهبت لبيت عزاء القريب لآخذ الخاطر ...ما أن سلمت على أرملة المرحوم وجلست بجانبها لاواسيها ...حتى بدأت بالكلام معي بصوره طبيعيه ...و كأننا في زياره  عاديه اخذت تسألني عن اخبار العرسان اللي حضرنا عرسهم الاسبوع الماضي وايمتى روحتوا من العرس وطولتوا بعدي وللا لأ؟؟؟
بصراحه انا اتفاجأت من تصرفها !!!...وعلى رأي "ويسبر"...شو بالنسبه؟؟؟
شو بالنسبه للمرحوم اللي ما صار له يومين متوفي؟ هلا وقته هالحكي؟
طيب انتي الارمله الحزينه ...ولوووووو ...لو هالحكي من اي حدا موجود بالعزاء كان قلت عادي ...لكن مش لهالدرجه !!!! أُحرجت بصراحه لانه صار في نظرات مش حلوه من أخوات المرحوم لجهتنا وتحججت بأني بدي احكي تلفون وطلعت عالباب شوي ولما رجعت جلست في مكان بعيد عنها

العزاء الثاني....رجعت منه قبل شوي ...الله يرحمه رجل في الخمسين و موت مفاجئ جداً
لا امراض و لا معاناة ولا شي ...توفي وهو على رأس عمله...بعد ما شرب قهوته الصباحيه وسقى الزريعات وطلع على شغله ...و الله يرحمه
هالمره قعدت بعيد...بحكم ان علاقتي بالارمله الحزينه اللي  المفروض أنها (على الاقل منهاره ) رسميه جداً...لكن نتيجة الموقف السابق ...صار انتباهي عندها ...لقيت انها طبيعيه جداً ومجامله و... في بعض الاحيان (مبتسمه) ...هلا ممكن هون يكون الوضع من باب الصبر وأن الله ألهمها الصبر والسلوان ...لكن برضو في شي مش طبيعي !!!!!!

أما انه الموت أصبح عادي جداً وما لو رهبه و "فقد هيبته مع الزمن"
أو
أو
أو

أنه النسوان  مش  طايقين أزواجهم ...... لهالدرجه!!!! لدرجة انه حتى ...شوية تصنّع للحزن ...مش زابط معهم 

أنه شوية حزن يا ستات ...بلاش عشان خاطر الميت ...عشان خاطر الاولاد اللي انحرموا من ابوهم ...عشان خاطر 25 سنه من العِشْره ولو انها كانت "عِسْره"
عشان خاطر الروح اللي صارت بدار الحق ...والله هو المسامح

صرخه مدويه من حواء للآوادم أصدقائي ....راجعوا أنفسكم ...وألحقوا صلّحوا اوضاعكم مع الزوجات ...لان من اللي  شفته يوم الجمعه واليوم ...الوضع مش مطمئن أبداً.
 

هناك 26 تعليقًا:

  1. احيانا بتكون المرأة متامسكة قدام الناس بس

    جدتى مثلا عاشت قصة حب اربعين عام كاملة هى مدة زواجها و يوم وفاة جدى كانت متماسكة و ترتب كل الامور و تنظم بهدوء و لما سالتها فيما بعد قالتلى الحزن فى القلب و لوحدنا مش قدام الناس لان المراسم لازم تمر بشكل رسمى

    ردحذف
  2. بحس انه لمن يكون البيت معبى و فيه ناس كتير ببيت الاجر اهل المتوفي كتير بتهون مصيبتهم عليهم بس ما بتعرفي كيف ممكن يصيرو لمن يخلى البيت عليهم خاصة الست
    الاعمال بالنيات و الحزن بالقلب المفروض
    بس برضه بتخيل لو انه هاد شعورها الحقيقي احسن بكتيييير لو انها بتمثل مثلا عل الناس انها حزنانة

    ردحذف
  3. الله يرحمهم ويرحم جميع امواتنا يارب

    ما أنا بحكي,, مابتروح غير عليّ بتروح عليه وبموت,, خلص اللي مات,, إندفن وخلصو منه في أسواء الأحوال

    وقصه " أنه النسوان مش طايقين أزواجهم" في منها شكله,, بس العتب مش بس ع الزوجات,, والخوات والبنات,, هدول شو كاننلهن المتوفي؟؟؟؟؟

    ردحذف
  4. wallah el 3alam battal 3ndha rahbeh wala e3teram wla la ishe...haik ana srt mo2men enno el sh3b el 3arabi sha3b mosh mo7taram l2nno ma be7terem kbeer ...ma be7terem mot...ma be7terem 3eshreh...ma be7terem sadaqa wala 7atta be7terem 7alo 3al aqal...fe kelmeh ana dayman ba2oolha ...el sha3b el 3arabi beddo terbayeh mn awwal wo jdeed...allah be3een bs

    ردحذف
  5. انا بقول انهم لساتهم مش مستوعبات الصدمة..عا غفلة
    بس يرّوحو الناس وتضل لحالها بالليل رح تعطيها عياط صبّاحي ..خدي مني
    الله يرحم موتاكم وموتى المسلمين

    ردحذف
  6. صباح الخير نيسان

    في البداية رحم الله أمواتكم وأموات جميع المسلمين وأدخلهم فسيح جنانه .

    أما بخصوص رسالتك الموجهه إلى (( الأوادم )) فيؤسفني أن أقول أنها رسالة صحيحة وفي مكانها ، فالعلاقات الزوجية في مجتمعنا تعاني من مشاكل خطيره وتحديدا في افتقادها للمودة والعواطف وطغيان الروتين والسلوكيات الكلاسيكية عليها ، وانا أرفض الادعاءات التي يحاول البعض تردادها بأن الأوضاع المعيشية الصعبة لاتمكن أحد من الالتفات إلى مثل هذه السخافات ، ولكن الحقيقة التي لابد من التوقف عن كتمانها هو أن البيت الذي تغيب عنه العاطفه يصبح بعدها كل شيء فيه سهلا للضياع .

    لن أتحدث كثيرا في الموضوع لأن له أبعادا عميقة جدا وتحتاج إلى نقاش مطول .

    كل الود

    ردحذف
  7. الله يرحم كل أموات المسلمين، الله وحده إللي بيعرف شو في في القلوب، لكن برضه الصح إنه الواحد يحترم الموقف و لو عشان الرسميات، فيه قصص كثيرة في هذا المقام بتذهب في نفس الإتجاه، الله بيعين

    ردحذف
  8. خالتي كانت هيك لما مات زوجها،بس هي من قد ما انصدمت بحياتها و عانت بطلت تحس مسكينة عشان هيك ما حد لامها،بس برضو الواحد بيحاول يحترم قدسية الموت،أو عالاقل يجامل المرحوم...بس و الله الواحد بطل يستغرب من اشي o_0

    ردحذف
  9. صباح الخير

    تيرز,أن تكون متماسكه و قويه ...نعم
    لكن مش فارقه معاها , و كأنه همّ وراح ....لا

    doomish
    men's section are way mooooore reliefed

    غير معرف
    برضو وجهة نظر ...لكن الحزن بيبان بوجود ناس وفي عدم وجودهم...ومش مطلوب انها تمثل و تذرف دموع التماسيح ...مطلوب انها تحترم الموت و الميت

    ام عمر
    تسلمي يا رب,,,الظاهر انها حاله عامه ,,,الناس من كتر المصايب وكثرة الموت ....صارت مشاعرها متبلده

    مواطن
    من ناحية انه الشعب العربي بدو تربايه من اول وجديد ...معك حق
    تربيه قائمه على الاحترام...ان نحترم انفسنا ونتصرف على هذا الاساس في كل المواقف

    ردحذف
  10. أزال المؤلف هذا التعليق.

    ردحذف
  11. نمروووده
    ممكن يا بطه ...آمين ...يرحم موتانا أجمعين


    أشرف

    تسلم يا رب

    سأقول لك كمان وكمان وكمان ... كم يعجبني عدم تحيّزك للاوادم و موضوعيتك فيما يتعلق بموضوع آدم وحواء...
    بما ان الموضوع يحتاج لنقاش مطول....فسانتظر ان تطرحه علينا قريباً عبر منبر افكارك وتساؤلاتك
    مين عارف يا اشرف...لعل وعسى ان نصل ألى حل وسط يرضي الطرفين في هذه المعضله الازليه

    صالح
    آمين...بالضبط المطلوب احترام الموقف بغض النظر عن ما في القلوب


    رين
    الله يرحم زوج خالتك وان شاء الله هي كمان تقدر تسامحه

    ردحذف
  12. مرحبا نيسان
    هلاء صار الرجل أصل البلاوي في الدنيا !!
    يعني لو الواحد ربى بس بزعل علي لما يموت، الغلط فيها هي مش في المرحوم

    بس سبحان الله هاد طبع النسوان
    "يكفرن بالعشير"
    الحمد لله على نعمة الذكورة

    ردحذف
  13. نادر
    اول شي ليش معصّب؟
    يا سيدي مش الرجال هم اصل المصايب ...بس هم جزء منها :)
    ولو انه الله يرحمه كان مدللها على حياته وكانت ملكة قلبه وبيته ...حتزعل على رحيله,,,وتزعل كتير كمان

    ردحذف
  14. مرحبا نيسان
    انا ما بعصب منك ابدا نيسان
    بس انتي بلشتي الإدراج بشكل ممتاز، لما ركزتي على جانب عدم احترام الموت
    بس بتفاجأ آخر الإدراج انك لبستيها للرجال
    فعلا نيسان الرجال هم جزء كبير من المصايب، والجزء شيء من كل
    والكل هم النساء :)
    وكل رجل فاسد في الدنيا، افسدته إمرأة، ( امه او مرته)
    لانو كل انسان ابن امه اولا وأخيرا، و أكيد انتي بتعرفي انو يوم القيامة بينحكى فلان ابن فلانة
    وكل شعب فاشل اساس فشله نسائه، وكل شعب ناجح اساس نجاحو برضو نسائه
    لأنك أكيد بتعرفي بيت الشعر لحافظ ابراهيم اللي بحكي
    الأم مدرسة إذا أعددتها ... أعدت شعبا طيب الأعرق

    لو انو كان مدللها، كان ما زعلت عليه، ما دام عندها ولاد، فهو الله معو
    انتي ما سمعتي مقولة
    غاية المرآة هي الطفل، أما الرجل فهو مجرد وسيلة
    وبزيد من عندي انو وسيلة انجاب وصرف مصاري

    ردحذف
  15. نادر باشا و نيسان هانم، طولوا بالكم يا جماعة، بلاش الأمم المتحدة تبعتلكم طوني بلير عشان يفصل بينكم.
    :-)

    بعيد عن المزح: أصابع إيدك بتختلف عن بعض، و الناس كمان، كل واحد بيفكر و بيشعر بشكل ثاني غير عن الثاني بغض النظر إن كانوا ذكوراً أم إناثاً، و هاذول إللي بتحكوا عنهم (ع كثرتهم) نماذج غير طبيعية، فلذلك صاروا قصة و بينحكى فيها.

    سؤال ع الهامش: ليش تغيرت "Nisan" إلى "Naysan"؟

    ردحذف
  16. نادر ... بخصوص ما قلته عن المرأه ...نعم اوافقك ...هي الاساس ولهذا تجد الهجمه الغربيه علينا الآن موجهه نحو المرأه تحديدا ...فالرجل قد فسد من زمان ومع هذا لم يفسد المجتمع ...اما اذا فسدت المرأه فسينهار المجتمع بما فيه
    ومع هذا انا ألوم الرجل لانه مش قادر يستوعب المرأه فهو يريد امراته ان تحمل جميع مواصفات بنات القرن الواحد والعشرين في مقابل ان يبقى هو يعاملها بمعايير العصور الوسطى

    يريدها متعلمه...لكن ممنوع النقاش وكلامه هو اللي بيمشي
    يريدهاموظفه ...لكن ممنوع ان تختلط مع زملائها الموظفين
    يريدها ملتزمه ومتدينه لكن ممنوع ان تصل رحمها
    وتهتم بأهلها لانها الله سخرها لخدمته وفقط
    بيجوز انا شتيت عن النقطه الاساسيه
    لكن كما استشهدت بكلام سيد المرسلين عليه الصلاة والسلام لن اجد خيراً مما قاله "ما أكرمهن الا كريم"
    و "خياركم خياركم لنسائهم"
    صدقني نادر...المرأه لا تكفّر العشير ...الا اذا كان العشير قد اخرجها عن اطوارها
    وجعلها تبكي كثيراً خلال سنين العشره لهذا تجف دموعها يوم رحيله
    لكن عليها على الاقل ان تحترم الموقف والموت بحد ذاته ...وانا نوهت لهذا في موضوعي


    صالح ...شكرأ لمداخلتك ونعم الوضع هون مش طبيعي
    لكن اخشى ن يتحول لظاهره
    بالنسبه للاسم ...
    في وحده صاحبتي بتضلها تمزح معي ...نيسان باترول وللا اكس تريل؟؟؟؟
    فغيرت التهجئه ...واظن ان اللفظ هيك اصح لغوياً

    ردحذف
  17. والله يانيسان لوسمعتي الكلام الي اتقال و الاسئلة اللي اتسئلت يوم عزاء ابويا الله يرحمه !!

    بس الناس عموما قلبها صار قاسي والموت ماصار ياثر فينا زي اول :(

    ردحذف
  18. الموضوع حلو وفي منو الحكي.. وبتنصدمي إذا حسيتي أهل الميت عادي بس كمان أوقات في ناس ما بيسمحو لحالهم يعبروا عن مشاعرهم حتى في حالة الموت.. انا بعرف وحده توفي والدها وفي العزاء كان الجميع يتحدث عن قوتها وكيف إنها ولا متأثرة بس أنا كوني كنت مقربة من لعائلة كنت سهرانة عندهم وفي الليل دخلت عليها المطبخ وكانت حابسة حالها فيه لقيتها منهارة بس تاني يوم قدام الناس كانت عادي
    يعني في ناس هيك
    http://hana-ihjoul.blogspot.com/

    ردحذف
  19. صباح الخير:
    والله مولعة من وراي وانا مش عارفة!

    يمكن السبب زي ما حكيتي انها مش طايقته وما هي مصدقة وهو يموت، ويمكن انه حياتنا غريبة وبصراحة إحساسنا تبلد لا احنا بنعرف نفرح عن جد ولا بنعرف نحزن عن جد ولا عارفين شو بدنا. والمشهد اللي بتحكي عنه شفته كتير ومش بس من مرته ومن اولاده وخواته يمكن الشخص الوحيد اللي بيكون حزين وبشدة ببيت الأجر هو امه او ابوه.

    ردحذف
  20. هلا البقية بحياتك بس بصراحة ضحكتيني كتير
    عن جد النسوان ما الهم طاقة على رجالهم بس مو لهاي الدرجة
    يعني وصلت لبيت العزا ؟ يمكن

    ردحذف
  21. يا بنت ,,,,الموت حق,,,ومكتوب ,,يعني كل واحد بيعيش عمره وهو حر كيف بيختار يعيشه بس برضه الست مش ملزمه تظهر حزنها ازا كانت مو حزنانه كتير ,,,يمكن شافت كتير وقليل وحست انو اجى الوقت عشان تستريح شويه ,,,,وتغقد تدعيلوا نت قلبها بعد ما مات ورنا اختار هاذ الشي مو هيه ,,,,
    والانسان هو الي بيرسم غلاته في قلوب الناس وهاد الشي بيبين عند وفاته وبعدها
    الله يرحمهم ,,,ولا تدري نفس ماذا ستكسب غدا ولا تدري بأي ارض تموت ,,,,,الله يحسن ختامنا

    ردحذف
  22. صباح الورد

    عظّم الله اجركم...الله يرحمهم و يتقبلهم و يصبر اهلهم

    هلأ في منو ان اهل المتوفي ببداية الصدمه بكونو مش كتير مستوعبين وحاسين باللي صار و بس يروحو الناس و تخلص ال 3 ايام اللي بضلو الناس رايحين جايين فيها بحسو بحم الموضوع

    لكن انهم مصدومين ما بعني انهم يضحكو و يتحدثو عادي...اذا مش مستوعبين انهم فقدو عزيز ما بعني ان رهبة الموت نفسها مش موجوده و تختفي


    بالنسبة لمين نلوم ...ادم و حواء التنين بكملو بعض بالحياه , وما بتقوم الحياة على شخص منهم و لكن تقصير واحد من الطرفين بخرّب التوازن و بشكل علل في الحياه

    نادر...
    حاسستك مزعوج و الموضوع اجا على وجع :)
    وبما انك ما كتبتلنا نكشة الاربعاء فأنا مضطره اني اصعّد الموضوع و ممكن اوصله للامم المتحده, بس يبعتولنا حد تاني غير توني بلير.... المسكين اللي فيه مكفيه ...شكلها مرته هي سبب فساده و بينهم قضايا و محاكم :)

    نيسانه...شكرا على ذكر اسمي, بحس حالي زي الصغار بس ما تتصوري قديش بنبسط لما اقرأ اسمي من ضمن البوست :)))

    ردحذف
  23. الموت لا يشكل واعظا ً "كبيرا ً" لنا هذه الأيام.
    + البني آدم يحتاج وقفة تصحيحية كما ذكرت -برأيي-

    ردحذف
  24. الله يرحم امواتنا جميعا

    مع الأسف في ناس او خلينا نقول بعض الناس علشان مانظلم أحد في العزاء كذا مافي عندهم احساس " او حزن للميت
    هناك من في صدمة في بداية الأمر وتشوفينه عادي بس بعد كم يوم ينفجر في البكاء>> هذي الفئة معذورة الصدمة النفسية ودورها
    لكن المصيبة اللي مايحس شي بموت اقرب الناس له ومو مهتم

    ردحذف
  25. مين سمعك!!!!
    كتبت عن شعبنا الفرايحي قبل فترة
    http://naserz.blogspot.com/2010/04/blog-post.html

    نفس الملاحظات تقريباً.
    ملاحظة، ليش هون إسمك Nissan بس برّة Naysan!

    ردحذف