الثلاثاء، يوليو 13، 2010

أطفاااال و موبايل



اطفاااااال
و
موبايل
لايخلو منهما اي بيت او شارع او سياره

لن تجد سياره تتحرك في شوارع عمان الا ويكون فيها طفلان على الاقل او ان الاطفال هم سبب تحركها...أحد الوالدين في السياره أما رايح للشغل عشان خاطر الاولاد...أو طالع مشوار مع الاولاد.......أو يأخذ احد الاولاد للطبيب....او بيوصلهم لمكان ... او رايح يجيبهم من مكان
ما في انسان مستعد يطلع بسيارته الساعه اتنين عز الظهر أو اتنين بنص الليل وبدون سبب طارئ ....الا عشان خاطر يشتري حفاظات او حليب او دواء للاولاد..او حتى قلم ومحايه....
ما في سياره في عمّان"الا في ما ندر" لن تشاهد فيها اولاد بنطنطوا في الكرسي الخلفي ...وفي الامام واحد او وحده ....بيحكوا بالخلوي...واحد بيسوق السياره ....والتاني بيصرخ على الاولاد عشان يقعدوا هاديين....كلو بوقت واحد
حتى أقول أن سبب أزمات السير في شوارع عمّان ....سببها ...طفل وموبايل

في المطاعم والمحلات...نفس الحكايه...اولاد بينطنطوا وناس ماسكه الموبايلات بتحكي من جهه وبتصرخ على الاولاد عشان يقعدوا هاديين من جهه تانيه

في الاعراس...اولاد بنطنطوا بين الطاولات او في احضان العرسان....والاطفال احباب الله...وحرام تكسر بخاطرهم....والموبايلات شغاله...حكي وتصوير

في السينما ...ولو كان فيلم رعب و لو عرض متأخر(على رأي زميلنا المواطن...مدونة مواطنون) ستسمع أصواتهم...بدي بوشار....بدي بيبسي.....ضربني...قعد محلي
وفي نفس الوقت سيكون هناك موبايل شغال ايضاً

في المستشفيات تجد اولاد زائرين أكثر من المرضى انفسهم
وأيضاً.....موبايل بيرنّ

في بيوت العزاء....سينخفض عدد الاطفال لكن لن يختفوا تماما...و تميل كفة الموبايل...في ايدي المعزيين....كبسات متتاليه لا تعرف هل هي مسجات أو ايميلات او العاب!!؟


الاثنين...موديلاتهم حديثه
الاثنين ... تكلفتهم عاليه
الاثنين...إزعاج في وقت الراحه
الاثنين...ملزقين فيك طول الوقت
ومستحيل أن تبدأ بحديث بدون ما يقاطعوك
الاثنين بيصّحوك من أحلى نومه
الاثنين بيلهّوك عن لقمة طعامك

الاثنين....بمجرد دخولهم الى حياتك ...فلن تستغني عنهم ابداً
وستقول....كيف كنت عايش بدونهم؟؟؟
الاطفال...ماشي
لكن الموبايل!!! ليه ؟؟؟

هناك 13 تعليقًا:

  1. ههههه جميل البوست يانيسان

    لكن مع احترامي لكل ام واب , بالنسبه ليا الاتنين ممكن الاستعناء عنهم هههه , بصراحة الله يعينكم على الاطفال بالذات , هم حلوين لما يضحكوا و بس , لكن لما يكونوا زعلانين او تعبانين يخبولوا و بقوة كمان .

    بس الله يخليلك اولادك يارب و يسعدهم دنيا و اخرة :)

    ردحذف
  2. الاثنين...موديلاتهم حديثه
    الاثنين ... تكلفتهم عاليه
    الاثنين...إزعاج في وقت الراحه
    الاثنين...ملزقين فيك طول الوقت
    ومستحيل أن تبدأ بحديث بدون ما يقاطعوك
    الاثنين بيصّحوك من أحلى نومه
    الاثنين بيلهّوك عن لقمة طعامك

    الاثنين....بمجرد دخولهم الى حياتك ...فلن تستغني عنهم ابداً
    وستقول....كيف كنت عايش بدونهم؟؟؟
    الاطفال...ماشي
    لكن الموبايل!!! ليه ؟؟؟
    روعة الربط نيسان
    تسلم ايدك
    بس أنا من ناحيتي عندي الإستعداد استغني عن ال2
    مجنون لدرجة التوحد مع شجرة
    كل الود نيسان

    ردحذف
  3. ههههههه جميل جدا
    زكرتيني بفرووحه بس يكون بابا بسوق و هي قاعده بالكرسي الخلفي معي ومع ماميتها, واقفه " تيدو " يعني سيدو و هات يا بوس, هلأ حليلها تبوس سيدو :) بتجنن حبيبتي...الله لا يحرم حد منهم, عجئه وصوت وفوضى بس احلى ازعاج بالدنيا :)

    انا بصراحه ما بستغني عن ال 2 :)
    الموبايل انا معتمده عليه تماما بكل شي, ارقام تلفونات مش حافظه اشي, وصفات اكل بال notes,ارقام IP مهمه بالشغل, ريمايندرز وهي اهم شي, انا ذاكرتي صايره مش ولا بد, فالله يخلي الريمايندر اللي بتزكرني بكل شي , وطبعا الحكي مع ماما وبابا كل يوم عالساعه 10 لاصبح عليهم وانا بالشغل :)

    ردحذف
  4. ههههههههههههه
    حلوة كتييييير عجبتني المقارنة

    أنا بالنسبة الي عندي استعداد استغني عن الاتنين
    اولا :الموبايل لاني بكره كترة الحكي والرغي وبيطق قلبي اذا طولت المكالمة وخاصة اذا اول 5 دقائق من المكالمة كانت كيفك؟ شو عامل؟ شو اخبارك؟ كيف حالك؟؟؟

    ثانيا: وخاصة في العطلة الصيفية الاولاد كترانين واحنا ما شاء الله عنا 22 حفيد زهقتهم وزهقت ازعاجهم ووصلت لمرحلة كراهية الاطفال وكل الطفولة.

    ردحذف
  5. انتي لازمك راحة
    شكلك تعبانة كتير و الوضع عاملك ازمة مع هيك الله لا يحرمك منهم
    طبعا الاولاد

    ردحذف
  6. صباح الياسمين يا نيسانة المدونين

    عن جد مافي مكان إلا رح يتواجد فيه الاثنين بس بصراحه متل ماقلتي بمجرد دخولهم على حياتنا مستحيل نستغني عنهم أبدا وعلى رأي المثل (( اللي بدوق الطعميه مابقدر يبعد عن الصنيه ))

    فكرة الربط في الادراج كتير حلوه عن جد ضحكت من كل قلبي وبخاصه مشهد المستشفيات والعزا :)

    نهارك سعيد

    ردحذف
  7. وفاء وكيّاله ونادر...صفّوا عاليمين جنب بعض...انتوا حزب المستغنيين:)

    وفاء..شكرا عالتاج مع اني كتبت عندك رح ارجع اكتبهم ببوست هون

    نادر ...والله هالربط طلع بالصدفه وانا عم بكتب ...اخر لحظه خطر ببالي ...طفره اتمنى ان تتكرر:)))

    كياله...الله يخلي الاحفاد يا رب...تقريبا عنا نفس العدد بعمارتنا وما حبيت اعقدكم بقصصهم .


    ويسبر...الله يخلي فرّوحه يا رب وما يحرمكم من حركاتها...المزعجه وغير المزعجه
    وديري بالك على موبايلك ليضيع:) مصيبه وانتي مخزنه عليه كل هالاشياء


    جفرا..تعبانه والله يا جفرا....لكن صامده والحمدلله

    يسعد صباحكم جميعاً

    ردحذف
  8. صباحك ياسمينه دمشقيه أشرف


    ميرسي على المثل ...و أزيدك من الشعر بيت,,,القط ما بيحب الا خنّاقو:)ء

    ردحذف
  9. اصحى يا نايم ووحد الدايم

    (حملة الجسد الواحد)

    أرجوا من المدونين الموقرين أن يضعوا شعار الحملة واسمها فقط فوقها (حملة الجسد الواحد) في الشريط الجانبي لمدوناتهم كدلالة على وحدة صف أمة محمد، ومن أجل قيام الولايات المتحدة الإسلامية.

    لمزيد من المعلومات

    http://dndanh111.blogspot.com/2010/06/blog-post_14.html

    جعله الله في ميزان حسناتكم .. آمين

    ردحذف
  10. ميحبا نيسانه

    كيف لو تشوفي حياتهم,, معظم اللي حكيتي عنهم,, جوات البيوت

    تخييييييييييييييلي في بنت بعرفها صار عمرها 17 سنه و عندها خدامه بس للملابس والأحذيه,, ت تغيرلها و تلبسها بعيدن عنك حذائها ؟؟؟

    ع هيك,, رح تشوفي الموبايل شي عادي بجنب هيك قصه

    ردحذف
  11. thanks. this is a great update
    Visit my blog
    http://dg2life.blogspot.com

    ردحذف